لا يحدث إلا في بارا..! 

لا يحدث إلا في بارا..!

د. حسن حسب الرسول سعيد

الذي يريد ان يتكلم عن بارا لا يعرف من اين يبدأ…
هل يبدا من كونها مركزا تجاريا وسياسيا وحضاريا ضارب في التاريخ ام يبدا بإنسان بارا المتميز حضاريا واخلاقيا
وعلي العموم فالفرحة ستعود ويرجع اهل البلد من بعد ما تبعثروا في قري وارياف بارا وام دم حاج أحمد والنيل الأبيض وغيرها…
في احد الايام وانا في محطة الوقود الوحيدة في بارا وبعد ملأ العامل التانك بالوقود سألته كم الحساب… قال حسابك خالص قلت له ياخي نحن في مطعم ولا في مواصلات حيث تعود اهل السودان يسددوا لبعض
أشار العامل لأحد الواقفين في المحطة وقال هذا الرجل سدد فاتورة وقودك وهذا الرجل من آل *معروف*
وفي مشهد اخر كنت في سوق بارا دخلت علي احدي البقالات وطلبت رصيد للتلفون كان احد آل *معروف* خلفي فاشار لصاحب المحل (دبل ليهووو وماتشيل منه قروش)
وحكي لي احد قدامي المعلمين وهو جارنا في سوبا شرق باستغراب كرم اهل بارا وكان تنقلات المعلمين مركزية حيث نقل من الجزيرة الي كردفان فذهب للابيض حيث الرئاسة فتم نقله بخطاب الي بارا وهناك التقي بشخصيات معروفة فقالوا له موضوعك ساهل انت مقرك النهائي ام سيالا والصباح سيتم ترتيب كل شى فقال لهَم طيب شوفوا لي لَكوندة ابيت فيها وكان معهم رجل من اهل بارا اسمه *عبدالله معروف* قال له يازول لوكوندة شنووو البلد دي مافيها لوكوندة انت ماشي معاي البيت وما عليك نحن بنرتب ليك كل شيء وفعلا قاموا صباح اليوم التاني بالترتيب مع مكتب التعليم واستخراج خطاب النقليه وحجز َمقعد امامي في عربة ام سيالا وتوصية السائق بان يذهب به لمكتب التعليم ولا تزال هذه الذكريات محفورة في ذاكرته كلما جلسنا ترحم علي عمنا عبدالله معروف ودعي لاسرته
ومن اعجب القصص انني تجولت كثيرا في قري محلية بارا بسبب بحوث مع أساتذة كلية الزراعة جامعة ام درمان الإسلامية او في متابعة تنفيذ مشروعات المياه وكلما مررت علي قرية حتي لو لم اقدم اي شي يحلفوا بالله هذه البهيمة لك اما نذبحها او ترفعها في العربية ويكون الخيار الأخير هو الانسب لانني مستعجل ولي برنامج يومي للطواف علي عدة قري فاصبح لي قطيع عند اخي ياسر علي معروف في بستانهم وفي يوم من الايام فاجأني اخي ياسر (يا حسن بهايمك دي كتيرة تعال شيلها) قلت له ياخي اضبح منها قال لي ضبحت وفترت🤣
وآل معروف يعود نسبهم إلى الصحابي الجليل جابر بن عبدالله النصاري الخزرجي وجابر بن عبد الله الانصاري ذريته في الشام وجنوب شرق آسيا واثيوبيا والسودان وقد الف استاذنا الشيخ جابر عبدالله معروف الأنصاري العديد من المؤلفات في ذلك
ومن القصص الماتعه قصة عمنا الشيخ ادم ابوالبشر من شيوخ التيجانية في كردفان زارني في إحدى الايام في الابيض في مكتبي وقال لي بلهجة حادة( يا اخي انتووو تقولوا نحن ناس دعوة وقاعدين في المكاتب المكيفة الليلة في مشكلة بين عائلتين في احدي قري بارا ووصلوا المحاكم تقوم معاي الآن نمشي نحل المشكلة دي او ماتتكلم تاني في الدعوة) قلت له نتحرك فورا والقرية إسمها *مجماجة* تحركنا فورا وصلنا القرية ليلا تجمع حولنا الناس كحال اهل القري
اتفضلوا… اتفضلوا
قلت لهم انا شخصيا ما بنزل مع اي زول وبنوم في الساحة دي
كيف الكلام دة انت زول ضيف ولابد تتفضل وعندنا مكان الضيوف
قلت لهم انا مما دخلت القرية دي عرفت سبب وجود الشيطان وسكنته معاكم في هذه القرية…. نحن مما تحركنا من الابيض ومرينا ببارا البلد دي كلها مساجد ومكان نمشي نسمع الاذان *علا* قريتكووو دي
قالوا طيب نعمل شنوو
قلت من بكرة الصباح كل زول في القرية يجيب شعبة او حطب او قصب وتعملوا مسجد ضهر تور وتصلوا جماعة وترفعوا الأذان حتي نحن نرجع ليكم ونشوف باقي المشاكل ورجعنا الصباح للابيض
بعد اسبوعين احد الموظفين قال في وفد عاوز يقابلك قلت خليهم يدخلوا فاذا هم أهل مجماجة
اتفضلوا
قالوا اول حاجة نحن كملنا المسجد صلينا فيه والحمدلله عملنا صلح وبقينا علي قلب رجل واحد
الحمدالله لله رب العالمين
وقصصنا في بارا كثيرا لكل مجموعة تنزل في وقتها
حفظ الله اهل بارا وبارك لهَم في مدبنتهم
د. حسن حسب الله سعيد
استاذ جامعي