مع المتألق أحمد الشبح:
الحرب غيرت مفهومي..و أضافت لي الكثير ..!
الاستقرار النفسي والمادي مهم جدا للفنانين..
(نجم كبير يمتلك صوتًا قويًا ويتمتع بخفة ظل وابتسامة لا تفارقه وحقق نجاحًا كبيرًا وانطلق فى مجال الغناء وأصدر أغانى وكليبات وألبومات عديدة تركت بصمات مع جمهوره ووصلت نجوميته عاليا ويقف “بالمرصاد” حتى يستمر الفن السوداني الأصيل ويطور فيها بشكل دائم وتربع على عرشها رصدنا بعض تفاصيله في هذا الحوار) .
حوار :جواهر شمس الدين
* في بداياتك هل توقعت ان تحجز لنفسك مقعدا في خارطة الغناء السوداني في وجود كثير من الفنانين علي نفس النمط ؟
* في الحقيقة لم أتوقع انو الاقي قبول في ظل وجود فنانين كبار في الوسط الفني بس الحمد لله حظيت بي قبول ودا السبب الاول والاساسي في نجاح الفنان
* كيف إستطعت أن توظف إمكانيات صوتك في تقديم ألحان وأغنيات ذات طابع طربي خرافي خلد في وجدان الناس؟
* أنا بعتبر الفضل يرجع للشاعر وليس الفنان لانو الشاعر وهو بكتب بكون بجميع حواسو ومعظم الشعراء تجدهم ملحنين جيدين .. ويجي دور الفنان انو يوصل جزء من إحساس الشاعر إن إستطاع التحية الى كل شعراء بلدي وانا بقول ليهم انو نحنا فخورين بيكم جدا
* في ظل شح الجوع في السودان بسبب الحرب هل من رسالة توجهها للمسؤولين ؟
* أنا أري انو المسؤولين ما حيقدرو يتحكمو في الجوع وفي ظروف البلد الحاصلة حاليا مالم يتم القضاء على التمرد تماما ونقول النصر لي قواتنا المسلحة السودانية
* هناك نجوما لا ينظرون الي الفن علي انه رسالة بل يكون كل تركيزهم علي المردود المادي واأنت ماذا تري ؟
* المردود المادي انا بعتبرو الوسيلة الاسرع لتوصيل الرسالة اذا انا ما عندي مبلغ من المال المحترم ما بقدر اطلع اغنية بي جودة ولا كلمات كويسه لانو الشاعر عايز المبلغ الفلاني واذا الشاعر ما ملحن الاغنية الملحن برضو عايز والاستديو و… فا انا بعتبر انو دي مكملة لي دي وانا ما ممكن اوصل رسالة وانا لا املك المال.
* هناك عددا من الفنانين قاموا بدور كبير وكرسو وقتهم وجهدهم لخدمة المواطنين في مناطق الاشتباكات وعرضوا أنفسهم لخطر الموت ؟ الحرب ماذا اضافت لك وما خصمت منك ؟
التحيه لكل شخص ما بس فنان لكل مغترب ولكل عامل ولكل استاذ ولكل شخص كرس وقتو وجهدو لخدمة اهلو في السودان وأناا اري انو ما مشحودين على الحاجه دي لانو دي حاجات اتربينا عليها كلنا كسودانين
مضيفا الحرب اضافت لي حاجات كتيره وغيرت مفهومي من حاجات كتيره وخلتني اتعرف على ناس انا مبسوط جدا بمعرفتهم وان شاء الله في الفترة الجايه دي حنشوف سودان جديد سودان موحد وسودان يسع الجميع وان شاء الله ربنا ينصر القوات المسلحة وربنا يصلح حال البلاد والعباد..
